شو الحل ؟؟؟

موضوع: شو الحل ؟؟؟ 21/11/2009, 3:55 pm

شو الحل؟ ...

ماحدا مبسوط لا بالبلد ولا برا البلد

شبين من سوريا بالغربة :

قلو, يازلمة يالله شو مشتاق لسوريا وللشام ..لك يلعن أبو الغربة شو صعبة (الغربة صعبة كتير يابا).. لك مو مصدق ايمت انزل اجازة عل الشام..
رد التاني: لك اخ خخخ والله معك حق .. لك تضرب الساعة لي تركت فيها البلد واجيت .. قال شو بدي أمن مستقبلي وأخلص من العسكرية...
قلو الأول: لك مافي أحلى من بلدنا .. دخيل ترابا .. ودخيل الزحمة والناس والمشاكل.. تتذكر شو كنا مبسوطين .. كيف كنا كل يوم بليل نروح و نأركل بعد الشغل بباب توما .. ونعمرها بعدين بشي جبل صنين (سلطة فواكه عند رامز)..
رد قلو: ولا الشاورما عند الأغر والبرج .. ولا البروستد عند القصور... لك مشتهي فيق الصبح وحدا يقلي صباح الخير واشرب القهوة معو..
لك مافي ناس ما في بشر تحكي معها وتحس فيون ويحسو فيك..
الأول: قهوة شو وصباح شو... لك اذا كان حظي حلو ممكن الهندي لي قاعد جنبي بالشغل يعبرني ويقلي كياليه (كيفك بالهندي)...... طبعا مع شوية هز بالراس ومابتعرف اذا مبسوط ولا زعلان.. وهاد كلو بعد ساعتين سواقة بالزحمة...
التاني: المصيبة انو 90 بالمية من العالم بالبلد حاسدين الشباب هون .. ولما بتشكي لحدا بتاكول بهدلة على كيفك وبيقولولك انو انت نقاق ومو خرج بسط..
قلو الأول: لك تركها لالله .. مفكرين انو المغترب ..معمر بيت فوق بير بترول.. وعم يكش دبان ... لك يارجل..لما بنزل على سوريا بتنزل العالم فيني أسئلة : كيف دبي ..أكيد مبسوط .. اوعى ترجع ها..... بشرفك دبرلي شغل..
ولما بقلون الشغل مو سهل والحياة صعبة كتير.. ماحد بيصدق وبيفكرو انو مابدي ساعدهون..
التاني: سيدي .. انت نزول وانبسط والله يمرق هالخمس سنين على خير..
الأول : قولتك رح ينزلو مدة الأغتراب؟
التاني : والله في هيك أشاعة ..
الأول: والله اذا بتتطلع صح.. الك احلى عزيمة عند موفق.. (محل مشاوي بالدويلعة)
التاني:ياربببببببببببببببببببببببببببببببببب.....

شبين من سوريا جوا سوريا:

الأول: لك الله يلعن أبو هالعيشة ..ماعاد فيني اتحمل..... زحمة وقرف وشغل بيهوي.. ومافي مصاري.. بدي سافر بي ايا طريقة ..بدي روح وشوف الدنيا وانبسط..
التاني: يا أخي نحنا بعمرنا مارح نتطور.. شوف وين صارت البشر .. ونحن وين.. لك شي بيطقق .. ولا أيا شي ممكن يخليك مبسوط .. ماني مرتاح بالشغل أبدا ... مديري يقطع عمرو شو غليظ .. أغلظ من هيك مستحيل تلاقي .. مو شاطر الا بالنق...ومابعرف على شو حاطينو مدير ( مجرد نق طيعا متل كل الموظفين على ايا مدير) .. ياسيدي حمار معبا بي بنطلون..
الأول: ولا عنا نحنا.. الشغل بي اخر الدنيا .. بدي شي ساعة لتوصل بالسرفيس.. هاد اذا لاقيت سرفيس.. وياريت راتب متل العالم والناس .. انا خلص استويت ولازم لاقي شغل بالخليج .. يا أخي الحياة هنيك غير ..بسط ومصاري وسيارات وبنات ... يعني بتعيش حياتك..
التاني: معك حق .. بتقضيلك 5 سنين وبترجع مليونير.. وياسيدي بلا ماترجع بيكون أحسن ..
...انا رفيقي واعدني انو يدبرلي شغل .. ويارب تظبط معي.....
الأول : انا مقدم السي في تبعي عل الأنترنت ومو مخلي موقع يعتب عليي...... ومبارح عملت انترفيو مع شركة بدبي.. وقال بيردولي خبر بي هاليومين.. وشو ماعطوني رح اقبل.. لأنو اكيد بيكفي وزيادة..
التاني : الله يوفقك .. ويتخلص من هالعيشة.....
الأول :أمين...

بالنهاية : شو بدو يحكي الواح ليحكي الواح . اذا حكا الواح بيقولو الواح حكا واذا ما حكا الواح بيقولو الواح ماحكا...... وشو بدو يحكي الواح تيحكي الواح..
حياتي اتو الشباب السوريين.

موضوع: رد: شو الحل ؟؟؟ 22/11/2009, 7:00 pm

اصبت كبد الحقيقة يا رنوش فانا والله اعد اللحظات لاعود الى بلدي وكل ما قلتيه عن الوحدة وفنجان القهوة والحنين الى الشاورما وغيرها صحيح ولكن عندما اعود الى سوريا اجد نفسي في بحر من الاسئلة كم جبت معك شو موفر شو بدك تعمل مشاريع هات دينا شي خمسمائة الف وكان الخمسمائة الف خمس ليرات فانا كما قلت مغترب اجلس فوق بئر بترول وما اكاد ابقى شهر او شهرين في سوريا الا ونفسي تعجل الرحيل والعودة الى ليبيا فعلا شي بحير وفي شي غلط بتركيبة الدنيا بس وين الغلط الغلط مو بسوريا الغلط ببعض الناس الحاسدين الطامعين الوصوليون الذين يفعلون اي شيء لمصالحهم دون التفكير بالغير والاصعب من هذا ان لا رقيب لهم يوقفهم عند الحد المطلوب فتستمر الكارثة وتبقى المعاناة ويبقى امثالنا يبحثون عن الحل

موضوع: رد: شو الحل ؟؟؟ 23/11/2009, 2:15 pm

................كلام سليم لاغبار عليه ................... تحياتي
وبعدين الله مارضى العالم

موضوع: رد: شو الحل ؟؟؟ 30/3/2010, 9:47 pm

والله هي القناعه كنز لايفنئ بالنسبه الي بحب الغربه كتير وبشتاق للبلد زيارات فقط اكيد الحنين موجود للوطن لكن لقيت الغربه احلئ بكتير تقبلو مروري .........الغريب

موضوع: رد: شو الحل ؟؟؟ 13/5/2010, 9:04 am

كل الكلام الذي قلتي اخت رانيا صحيح وواقع عم يعيشوا قسم كبير من شباب هاد الجيل بس في شي اسمو القناعة يعني الواحد فينا يقول الحمدلله على الصحة والعافية اول شي وبعدين في يسعى انو يأمن حالو بشغلة حلوة بس ما يتكبر عالشغل ويصعد درجة درجة لحتى يحصل عالشي اللي بيطمح الو بس يكون ضمن قناعة معينة وبالنهاية هادا واقع عاكل الشباب مو بس عليه لحالو متل مابيقول المتل حط راسك بين الروس وقول ياقطاع الروس

مشكورة عالموضوع لانو عنجد خرج انو ينحكى فيه ويتلاقالو حل جذري

موضوع: رد: شو الحل ؟؟؟ 2/6/2010, 4:56 am

حلو كتير طرحك لهل المشكلة بس يا رنوووووووووووووش وين الحل البطالة هون كل مالا بزيادة والغلا كل مالو بطلوع والحالة ( تعبانة يا ليلى) ومشكلة الغربة ما ألها حل بس عالقليلة الواحد اذا هاجر بينولد فيه احساس انو ممكن يأمن مستقبلو وبعيش عهالأحساس بس هون اللي ماعندو اساس قوي يوقف عليه صعب يحس هالأحساس وشكرا ألك كتير

موضوع: رد: شو الحل ؟؟؟ 6/6/2010, 5:07 pm

شكراً لمروركن يا شباب كلكم ذوووووووووووق

موضوع: رد: شو الحل ؟؟؟ 7/6/2010, 3:00 am

دبي حلوة صحيح
والغربة صعبة صحي
والبلد عنا حلوة
والعيشة صعبة

وعلى قولة أم زياد
((( إذا رجعت بجن وان تركت بشقى ,, لا قدرانة فل ولا قدرانة ابقى ))))

موضوع: رد: شو الحل ؟؟؟ 10/6/2010, 5:42 pm

ارجو المعذرة لانني سوف اشترك بالرد في هذا الموضوع للمرة الثانية لكن ليس على الموضوع بل على الاخ العضو المسمى بالغريب لانه قال بشتاق للبلد لكني لقيت الغربة احلى بكتير وانا اقول له بماذا احلى بالعمر الذي يضيع هباء منثورا في غربتنا ام بقلقنا من اي قانون جديد في غربتنا ام من حرقة الاشتياق لرؤية الاهل ام وام ام وماذا اقول صحيح الغربة احيانا تعطينا شوية مصاري بس بتاخد منا كتير كرامة لان الغريب يبقى غريب ان سكت على الاهانة كانت مصيبة وان رددت عليها كان حبس وترحيل وانا لي في الغربة عشرين عاما لاسباب خارجة عن ارادتي والله والله لو قدر لي ان اعود بالماضي عشرين عاما للوراء اضحي بكل ما لدي لان كل دقيقة في بلدي بمرها تسوى سنينا في الغربة بحلوها وتذكر انو احلى ايام العمر ايام كنا صغار

موضوع: رد: شو الحل ؟؟؟ 23/10/2010, 3:23 pm

الموضوع جميل ومهم ، أنا مقيمة في الامارات من تسع سنوات فعلا هذا مايحدث هنا وما يقوله المغتربون وعندما نأتي في الاجازة هذا ما نسمعه من الناس ، من وجهة نظري أنه يجب أن نعرف ما نريد أولا وما يسعدنا ونسعى من أجله باستمرار بالرغم من وجود العقبات في اي طريق نسلكه ولكن يجب ان نتحلى بالامل والتفاؤل والقناعة ايضا ونحقق في حياتنا مايجعلنا سعيدين.

موضوع: رد: شو الحل ؟؟؟ 1/11/2010, 1:13 pm

شكرا لمروركن

بتمنى من كل المغتربين يرجعوا ع ارضن بخير وسلامة ونلتقي معن اكيد الحكي بهالموضوع ما بيخلص

موضوع: رد: شو الحل ؟؟؟ 21/12/2010, 12:24 pm

بظن اذا المغتربين اللي برى بيرجعوا والمغتربين اللي جوى بيطلعوا بيشعر كل واحد بشعور الاخر والله شعو شعورك رنوشة ؟